DANTISCUM

DANTISCUM

Poloniae urbs. ad Vistulam fluv. munitissima, advectis mercibus clarissima, et opulentissima, vulgo Dantzig.

Male, inquit Ferrar. a Steph. in Polonia collocatur, cum sit urbs ac emporium Russiae, una ex 4. praec. Hanseaticis. Vocatur et Gedanum: Unde cives Gedanenses et Dantiscani. Hanc adversus Crucigeros munivit Primislaus Polon. Rex A. C. 1295. Cromer. l. 11. Prodita est Marchionibus Brandeburg. a Petro Cancellario Pomeraniae Regi Uladislao Loctico irato: mox arx a Crucigeris occupata, quorum ope Rex illam tuiturus erat. Qui cum postulatam immensam pecuniae vim solvere recusaret, illi urbem insuper, summâ cum sanguinis effusione, expugnando rapuerunt, A. C. 1310. Cives Sigismundus Augustus, ob non admissos Legatos suos, qui plebem cum Optimatibus conciliarent, portorii dimidiâ parte multavit; causasqueve maioris momenti, non obstante Casimiri privilegio, ad Senatum regni transtulit, A. C. 1569. Proscripsit urbem Stephanus Rex quod subiectione sibi denegatâ, Austriacis adhaereret, urbemqueve obsedit, mutuâ clade: Donec Principum interventu, urbi pax et religionis libertas concessa est, A. C. 1597. Cum urbe quoque de vectigalibus controvertit Uladislaus IV. Coetera, Religio Protestantium in urbe viget, in Senatum nemo nisi qui Augustanae Confess. est, legitur, Reformatorum hîc ingens numerus, Pastores semper eximios habent: Iesuitis templum Marianum et Coenobium S. Brigittae adiudicatum quidem A. C. 1596. sed inde Senatus Urbis edicto intra tribuum discedere coacti sunt. Chytraeus Chr. Saxon. par. 5. longitud. 41. 30. Lat. 54. 20.